साईडपट्टीचे नुकसान सुरूच

महामार्गाच्या विस्तारीकरणाचे काम आधीच संथ गतीने सुरू असताना, आता या केबलच्या कामामुळे वाहन चालकांच्या अडचणीत भर पडली आहे. रात्रीच्या वेळी किंवा पावसाच्या दिवसांत ही उकरलेली साईडपट्टी व त्यामुळे पडलेले खड्डे  दिसत नसल्यामुळे वाहने घसरून मोठ्या अपघातांची मालिका सुरू होण्याची भीती निर्माण झाली आहे. अनेक ठिकाणी दुचाकी आणि चारचाकी वाहने या खड्ड्यांमध्ये अडकून किरकोळ अपघात घडले आहेत. स्थानिक ग्रामस्थांनी आरोप केला आहे की, संबंधित ठेकेदार केवळ आपले काम उरकून मोकळा होण्याच्या मागे आहे, परंतु सुरक्षेच्या दृष्टीने कोणतीही खबरदारी घेतलेली नाही. रस्त्याचे एवढे नुकसान होत असताना संबंधित महामार्ग प्राधिकरण आणि स्थानिक प्रशासन याकडे डोळेझाक का करत आहे, असा प्रश्न नागरिक विचारत आहेत. एखादा मोठा अपघात होऊन कोणाचा नाहक बळी गेल्यावरच प्रशासनाला जाग येणार का, अशी विचारणा आता केली जात आहे.