नागोठण्यातील पुलाची पाहणी

नागोठण्यातील हा धोकादायक महाकाय पूल सध्या सुरक्षेच्या कारणास्तव बंद करण्यात आला आहे.  या धोकादायक महाकाय पुलावरून गणेशोत्सव काळात कार सारखी हलकी वाहने सोडता यावीत यासाठी  महामार्गावर थातूरमातूर डागडुजी करण्याचे काम महामार्ग प्राधिकरण व महामार्गाचे ठेकेदार कल्याण टोल प्लाझा कडून सुरू आहे. या डागडुजीच्या कामातील हास्यास्पद बाब म्हणजे या पुलावर भेगा पडलेल्या ठिकाणी साधारण एक फुटाची खाच मारून, या खाचेच्या दोन्ही टोकांना दोन छिद्र मारून त्यामध्ये पोलादी सळी टाकण्यात येत आहे. या सळीमुळे पुलाची भेग मोठी होणार नाही अशी शक्यता गृहीत धरून ठेकेदाराकडून ही धडपड सुरू आहे.

याशिवाय पुलाच्या बाहेरील बाजूस दोन पॅनलच्या भेगांमध्ये काचेची पट्टी लावून त्याच्या दोन्ही टोकांना एम सील लावण्यात येत आहे. एमसीएल द्वारे दोन पॅनलच्या भेगांमध्ये लावलेले ही काचेची पट्टी या पॅनलला किती मोठा आधार देणार असा हास्यस्पद प्रश्न निर्माण होत आहे. त्यामुळे अशा प्रकारच्या नवीन नवीन हास्यास्पद युक्त्या काढणारे महामार्ग प्राधिकरणाचे व कल्याण टोल प्लाझाच्या अधिकाऱ्यांची बुद्धीची कीव करावी तेवढी कमीच आहे असेही बोलले जात आहे.