खासदार सुनील तटकरेंना साकडे

मुंबई–गोवा राष्ट्रीय महामार्गावरील वाढत्या अपघातांची संख्या, नागोठणे परिसरातील औद्योगिक वसाहती आणि नागरिकांची आरोग्य सेवेची गरज लक्षात घेता नागोठणे येथे अत्याधुनिक ट्रॉमा केअर  सेंटर उभारणे अत्यंत आवश्यक असल्याचे निवेदनात नमूद करण्यात आले आहे. या निवेदनात पुढे म्हटले आहे की,  मुंबई गोवा महामार्गावर दररोज मोठ्या प्रमाणात वाहतूक सुरू असून अपघातांच्या घटना वारंवार घडत असतात.  दुर्दैवाने नागोठणे परिसरात पुढील सुमारे ४० ते ६० किलोमीटर अंतरापर्यंत कोणतीही सुसज्जन आपत्कालीन वैद्यकीय सुविधा उपलब्ध नाही.  तसेच नागोठणे व परिसरातील सुमारे १०० ते १२५ गावे व वाड्यांमधील नागरिक नागोठणे प्राथमिक आरोग्य केंद्रावरच अवलंबून आहेत.  अपघात किंवा इतर अपत्कालीन परिस्थितीत तातडीने उपचार मिळण्यास विलंब होत असल्यामुळे अनेकदा रुग्णांचे प्राण धोक्यात येतात.  ही परिस्थिती लक्षात घेता नागोठणे प्राथमिक आरोग्य केंद्र येथे अत्याधुनिक सुविधा असलेले ट्रॉमा केअर सेंटर उभारणे अत्यंत आवश्यक आहे. यामुळे अपघातग्रस्तांना त्वरित उपचार मिळून त्यांचे प्राण वाचविण्यास मोठी मदत होईल.  तसेच संपूर्ण परिसरातील आरोग्य सेवेत लक्षणीय सुधारणा होईल.  त्यामुळे या विषयाकडे आपण गांभीर्याने लक्ष देऊन नागोठणे येथे ट्रॉमा केअर सेंटर उभारण्यासाठी आवश्यक ती कार्यवाही करावी अशी मागणीही खासदार सुनील तटकरे यांच्याकडे या निवेदनाद्वारे करण्यात आली आहे.