रिलायन्सने प्रियदर्शनी वाहतूक संस्थेचे काम पूर्ववत सुरू करावे : खा. सुनील तटकरे 

नागोठण्यातील प्रियदर्शनी चालक-मालक–वाहक सहकारी वाहतूक संस्थेच्या पदाधिकाऱ्यांनी लोकनेते,  खासदार सुनील तटकरे यांना दिलेल्या निवेदनात म्हटले आहे की, नागोठणे परिसरातील स्थानिक मालक, चालक व वाहक असलेली ही वाहतूक संस्था गेली २९–३० वर्षे नागोठण्यातील रिलायन्स कंपनी येथून मालवाहतुकीचे व्यवसाय करीत आहे.  आम्ही रिलायन्स कंपनीचे मुख्य वाहतूकदार आहोत व आम्ही पूर्णतः रिलायन्स कंपनीवर अवलंबून आहोत आणि आम्हाला सुरुवातीपासूनच कंपनीतील एकूण माल वाहतुकीच्या ६० टक्के काम मिळत होते.  परंतु मागील दोन वर्षापासून आमचे भिवंडी व पुणे येथील स्थानिक काम २० टक्के कमी केले आहे.  यामुळे आमच्या प्रियदर्शनी वाहतूक संस्थेचे चालक व मालक यांना पुरेसे काम मिळत नाही. भविष्यात असेच चालू राहिले तर संस्थेच्या सभासदांवर उपासमारीची वेळ येऊ शकते.  सदर संस्थेत नागोठणे पंचक्रोशी मधील चालक व मालक आहेत.  सदर कामाबाबत नागोठण्यातील रिलायन्स कंपनी व त्यांच्या घनसोली येथील कार्यालयात संबंधित अधिकारी मनोज नायर  यांची समक्ष भेट घेऊन तसेच ई-मेल द्वारे संपर्क केलेला आहे व त्यांना याची कल्पना दिलेली आहे.  परंतु त्यांच्याकडून जाणीवपूर्वक दुर्लक्ष होत आहे असे आमचे मत आहे.  तरी आपणाकडून कंपनीच्या मुख्य अधिकाऱ्यांना बोलवून संस्थेस सहकार्य करून आम्हाला योग्य तो न्याय मिळून द्यावा अशी विनंतीही प्रियदर्शनी संस्थेच्या पदाधिकारी व सल्लागार मंडळाकडून खासदार सुनील तटकरे यांना करण्यात आली आहे.