खैरवाडी क्रॉसिंग बंद न करण्यासाठी ग्रामस्थांचे खा. सुनील तटकरेंना साकडे

यासंदर्भात खैरवाडी गावातील आदिवासी बांधवांनी लोकनेते,  खासदार सुनील तटकरे यांना दिलेल्या निवेदनानुसार खैरवाडी गावाच्या नावाने असलेला बस स्टॉप व क्रॉसिंग मुंबई गोवा महामार्गाचे कंत्राटदार यांनी महामार्ग चौपदरीकरणाच्या कामात बंद केला आहे. त्यामुळे खैरवाडी, मांडवशेत, वाघ्रणवाडी, उसर नंबरवाडी तसेच पावसाळ्यात प्रसिद्ध अशा सुकेळी परिसरातील वरदायिनी धबधबा येथे येण्या – जाण्यासाठी या भागातील लोकांना व पर्यटकांना खैरवाडी फाट्या जवळ जाण्यासाठी खांब टोल नाका तसेच सुकेळी येथील जिंदाल कंपनी अशा लांबच्या ठिकाणी मोठा वळसा घालून यावे लागणार  आहे. तसेच खैरवाडी फाट्याकडून येणारा रस्ता हा मोठ्या ओढ्याकडून येत असल्याने पावसाळ्यात रस्त्यावर पाणी येत आहे. त्यामुळे या ओढ्यालगत संरक्षण भिंत बांधण्याची मागणीही खैरवाडी येथील ग्रामस्थांनी केली आहे.

यावेळी खैरवाडी व परिसरातील आदिवासी वाड्यातील ग्रामस्थांसोबत राष्ट्रवादी काँग्रेसचे नागोठणे विभागीय नेते भाई टके, शिवरामभाऊ शिंदे, सदानंद गायकर, ऐनघर ग्रामपंचायतीचे उपसरपंच भगवान शिद, सामाजिक कार्यकर्ते जानू वारगुडे आदींसह खैरवाडी, मांडवशेत, वाघ्रणवाडी, उसर नंबरवाडी या भागातील ग्रामस्थ व महिला यावेळी मोठ्या संख्येने उपस्थित होत्या.