खा. सुनील तटकरे यांचे ठोस आश्वासन  

नागोठणे प्रवासी संघटनेने खा . सुनील तटकरे यांना दिलेल्या निवेदनात म्हटले आहे की,  नागोठणे हे शिवकालीन वारसा लाभलेले तसेच भौगोलिक दृष्ट्या रायगड जिल्ह्याचे  महत्वाचे मध्यवर्ती ठिकाण आहे. नागोठणे हे मेट्रोपॉलिटीन तसेच इंडस्ट्रीयल झोन आहे. नागोठणे शहरालगत रिलायन्स (NMD)  पृवीची IPCL,  जिंदाल ग्रुपची महाराष्ट्र सीमलेस लिमिटेड, विभोर स्टील ट्यूब, सुप्रीम पेट्रोकेमिकल, जे.एस.डब्ल्यू स्टील असे मोठ मोठे कारखाने आहेत. तसेच नागोठणे शहरा आजूबाजूला पेण तालक्यातील अर्धा भाग, रोहा तालुक्यातील अर्धा भाग व सुधागड तालुका असे मिळून १२६ गावे आहेत. या सर्वांना रेल्वे प्रवासाकरिता मध्य रेल्वेचे नागोठणे रेल्वे स्थानकात यावे लागते. पण रेल्वे सुरु झाल्या पासून आता पर्यंत नागोठणे रेल्वे स्थानकात फक्त मुंबई दिशे कडे सकाळी ०५:३० वा. ०६:५५ वा. ११:१५ वा. व दुपारी १६:१० वा. आणि कोकण दिशे कडे, संध्या १८:३० वा., १९:२२ वा., व रात्री २०:३५ वा. रेल्वे सेवा आहे.  कोकण रेल्वे १९८६ साला पासून सुरु झाली पण कोरोना (कोविड १९) पूर्वी गाडी नं. १०१०५ – १०१०६ दिवा – सावंतवाडी – दिवा ही गाडी नागोठणे स्थानकात सकाळी कोकणात जातांना व  संध्याकाळी पनवेल, दिवा बाजूकडे जातांना थांबत असे.  पण कोरोना नंतर या गाडीचा थांबा अचानक बंद करण्यात आला आहे. नागोठणे हे शैक्षणिक हब असल्याने १०१०५ – १०१०६ दिवा – सावंतवाडी – दिवा या गाडीने विद्यार्थी व प्रवासी अप आणि डाउन करत असत. या गाडीचा नागोठणे थांबा बंद करण्यात आला आहे तो थांबा पूर्ववत देण्यात यावा व हॉलिडे स्पेशल मेल एक्सप्रेस रेल्वे गाड्यांना नागोठणे रेल्वे स्थानकात थांबा मिळावा तसेच गाड़ी नं १२६१९ – १२६२० लोकमान्य टिळक टर्मिनस(LTT) – मंगळूर सेंट्रल – लोकमान्य टिळक टर्मिनस(LTT), १२६१७ – १२६१८ एर्णाकुलम जं – हज़रत निज़ामुद्दीन – एर्नाकुलम जं, १२६१८ – १२६२० व मुंबई LTT – मंगलोर – मुंबई LTT या एक्प्रेस गाड्यांना नागोठणे रेल्वे स्थानकात थांबा मिळावा अशी मागणी या निवेदनातून करण्यात आली आहे. या मागणीस खासदार सुनील तटकरे यांनी सकारात्मक प्रतिसाद दिल्याने प्रवासी वर्गातून समाधान व्यक्त करण्यात येत आहे.