नागोठण्याची ग्रामदेवता श्री जोगेश्वरी मातेचा पालखी सोहळा उत्साहात संपन्न 

पालखी ग्रामस्थांना दर्शनासाठी नागोठण्यातील सर्व भागांत नेण्यात आली. सर्वच ठिकाणी ग्रामस्थांनी तसेच तरूण-तरूणी, महिला व आबाल वृध्दांनी पालखीचे वाजत-गाजत- नाचत उत्साहात स्वागत केले.   या पालखी सोहळ्या निमित्ताने नागोठण्यातील परंतु नोकरी, व्यवसाया निमित्ताने गावाबाहेर असलेले चाकरमानी, ग्रामस्थ आणि माहेरवाशिणी गावात आवर्जून परतल्या होत्या. जोगेश्वरी मातेच्या या पालखी सोहळ्याच्या  निमित्ताने ग्रामस्थांना घरोघरी मातेचे दर्शन होणार असल्याने मातेच्या स्वागतासाठी सर्वत्र आकर्षक सजावाटी, रांगोळ्या काढून तसेच विद्युत रोषणाई करून स्वागतकमानी उभारण्यात आल्या होत्या. त्यामुळे संपूर्ण गावात एक आनंदाचे, उत्साहाचे व भक्तीमय वातावरण निर्माण झाले होते.

फोटो : कुंभार आळी ग्रामस्थ मंडळाचा सत्कार करतांना देवस्थान विश्वस्त समितीचे सचिव भाई टके सोबत उत्सव समितीचे अध्यक्ष चंद्रकांत ताडकर व ग्रामस्थ

माहेरवाशिणींचा व परगावावरून आलेल्या नागोठणेकरांचा हिरमोड

श्री जोगेश्वरी मातेच्या पालखी सोहळ्यानिमित्त माहेरवाशिणी माहेरच्या घरी येत असतात. मात्र पालखी सोहळ्यात डिजे वाजविण्यावर बंदी असतानाही  यावर्षी काही ठिकाणी नाचण्यासाठी खूप वेळ डीजे वाजविला गेला. पालखीच्या दोन्ही बाजूने दर्शन घेण्याच्या सूचना असतांनाही दोन्ही बाजूने दर्शनास निरुत्साह व महिलांची एकच बाजूला दर्शनासाठी इच्छा, फोटो काढण्यासाठी आणि नाचण्यासाठी पालखी खूप वेळ थांबविली गेली अशा या अनेक कारणांनी पालखी सर्वच ठिकाणी उशिराने पोचली. त्यामुळे आपल्या माहेरच्या घरासमोर पालखीचे दर्शन घेण्यासाठी एक दिवसासाठी आलेल्या माहेरवाशिणींना आणि नोकरी–व्यवसायानिमित्त परगावी राहणाऱ्या आणि एक दिवसाची सुट्टी काढून आलेल्या नागोठणेकरांना दुसऱ्या आळीत किंवा इतर ठिकाणी जाऊन पालखीचे दर्शन घ्यावे लागल्याने त्यांनी नाराजी व्यक्त केली.  दरम्यान रोहा सारख्या मोठ्या शहरात श्री धावीर महाराजांचा पालखी सोहळा कमीत कमी वेळेत पूर्ण होत असतानाही नागोठण्यात पालखी सोहळा पूर्ण होण्यास चार दिवस व ८४ तास लागत असतील तर भविष्यात यावर सर्व ग्रामस्थांनी गांभीर्याने विचार करण्याची गरज असल्याचे मत गावातील काही जाणकार व वरिष्ठ मंडळीकडून व्यक्त करण्यात येत आहे.