पळस येथील जागृत देवस्थान पळसाई मातेचा आज पालखी सोहळा

नवसाला पावणारी देवी म्हणून प्रसिद्धी असलेल्या तसेच भक्तगणांना देवीची तशी प्रचीती येत असल्याने संपूर्ण रायगड बरोबरच ठाणे, मुंबई, पुणे येथून दरवर्षी येणाऱ्या भाविकांची वर्दळ वाढतच असल्याचे अलीकडील काही वर्षांपासून पहावयास मिळत आहे. मुंबई व इतरत्र ठिकाणी कामानिमित्त असलेली परिसरातील मंडळी तसेच माहेरवाशिणी या न चुकता चैत्र पालखी सोहळ्यासाठी व नवरात्रोत्सवासाठी पळस येथे येतात. विशेष म्हणजे नवसपूर्ती नवस फेडण्यासाठी येणारी महिला व पुरुष मंडळी ही नऊ दिवस मंदिरात राहतात. यावेळी मंदिरात राहणाऱ्या भक्तांसाठी सामूहिक भोजनही ठेवण्यात येते‌. नवरात्रोत्सवात नऊ दिवसांमध्ये आयोजित करण्यात येणाऱ्या भरगच्च धार्मिक व सांस्कृतिक कार्यक्रमांमध्ये पाचव्या माळेचे येथे असलेले अनन्य साधारण महत्व हे या नवरात्र उत्सवातील येथील प्रमुख आकर्षण असते. या दिवशी लाखोंच्या संख्येने भक्तगण देवीच्या दर्शनासाठी मंदिरात येतात आणि त्यावेळी मंदिर परिसराला एखाद्या मोठ्या जत्रेचे स्वरूप येते. नवरात्र उत्सवाप्रमाणेच यंदाही चैत्र पालखी सोहळा निर्विघ्नपणे व भक्तिमय वातावरणात, उत्साहात साजरा होण्यासाठी उत्सव समितीचे सर्व पदाधिकारी, सदस्य, ग्रामस्थ व महिला मंडळ मेहनत घेत आहेत.