आरोग्य केंद्र स्थलांतरित करण्याचा कुटील डाव

याबाबतीत रोहा पंचायत समितीच्या तालुका वैद्यकीय अधिकाऱ्यांकडून नागोठणे प्राथमिक आरोग्य केंद्राचे स्थलांतर भाड्याच्या जागेत करण्यासंदर्भात आणि नागोठणे प्राथमिक आरोग्य केंद्राचे हस्तांतर सदरच्या इमारतीत करण्यासाठी परवानगी मिळावी अशी मागणी करणारे पत्र दिनांक १८ मे , २०२६ रोजी सुप्रीम पेट्रोकेम कंपनीच्या व्यवस्थापनाला पाठविल्याची धक्कादायक बाब समोर आली आहे. त्यामुळे नागोठणे प्राथमिक आरोग्य केंद्र वांगणी–आमडोशी येथील सुप्रीम पेट्रोकेम कंपनीची इमारत भाड्याने घेऊन नागोठणे प्राथमिक आरोग्य केंद्र तेथे हलविण्यासाठी शासनस्तरावर हालचाली सुरू झाल्या आहेत.  प्राथमिक आरोग्य केंद्राच्या दुरुस्तीसाठी निधी उपलब्ध नसल्याचे कारण वरिष्ठ अधिकाऱ्यांकडून पुढे केले जात असतांनाच शासनाकडे भाड्यासाठी पैसे आहेत का ? असा प्रश्न नागरिकांतून उपस्थित केला जात आहे. त्यामुळे दुसऱ्या इमारतीचे भाडे भरण्यासाठी तयारीत असलेल्या रायगड जिल्हा परिषदेच्या आरोग्य खात्यातील वरिष्ठ अधिकाऱ्यांचे या प्रकरणी काही आर्थिक साटेलोटे असल्याची उलट सुलट चर्चाही नागोठण्यात सुरू झाली आहे.

मुंबई गोवा महामार्गावरील मध्यवर्ती व महत्वाचे असलेले नागोठणे प्राथमिक आरोग्य केंद्र स्थलांतरित करण्याच्या प्रक्रियेला ठाम विरोध करण्यासाठी नागोठणे ग्रामपंचायतीच्या सरपंच सुप्रियाताई महाडिक, उपसरपंच ज्ञानेश्वर साळुंखे यांनी प्रखर विरोध करीत राजिपच्या आरोग्य खात्याला  पत्रव्यवहार सुरू केला केला आहे. याचाच एक भाग म्हणून नागोठणे प्राथमिक आरोग्य केंद्रात शुक्रवारी(दि.२२) सकाळी नागोठणे प्राथमिक आरोग्य केंद्राच्या तात्पुरत्या नियुक्तीवर असलेल्या वैद्यकीय अधिकारी डॉ. अस्मिता नाईक यांच्याशी सरपंच सुप्रियाताई महाडिक व उपसरपंच ज्ञानेश्वर साळुंखे यांनी महत्वपूर्ण बैठक घेऊन नागोठणे प्राथमिक आरोग्य केंद्र इतरत्र हलविण्याच्या प्रकाराला तीव्र विरोध केला. यावेळी ग्रामपंचायत सदस्य संतोष नागोठणेकर, सचिन ठोंबरे, सदस्या शबाना मुल्ला, ज्योती राऊत, सुनील लाड, नंदा गायकवाड, बाबू घाग आदींसह ग्रामस्थ आणि प्राथमिक आरोग्य केंद्राचे कर्मचारी यावेळी उपस्थित होते.