राजन शेलार यांचे निधन

समाजसेवक राजन (राजाभाऊ) शेलार यांचे आकस्मिक निधन

माणगावकरांनी वाहिली भावपूर्ण श्रद्धांजली

माणगाव तालुक्यातील खांदाड येथे जन्मलेल्या राजाभाऊ शेलार यांनी आयुष्यभर समाजसेवेला वाहून घेतले. लोकांच्या अडचणी सोडविणे, शासकीय कामांमध्ये मार्गदर्शन करणे आणि सर्वसामान्यांना प्रामाणिकपणे मदत करणे हे त्यांच्या कार्याचे प्रमुख वैशिष्ट्य होते. त्यांचा लोकसंपर्क दांडगा असून सर्व स्तरातील नागरिकांमध्ये त्यांना विशेष मान होता.

राजाभाऊ यांनी लोकप्रिय दिवंगत आमदार अशोकदादा साबळे यांचे सचिव म्हणूनही जबाबदारीने काम पाहिले. आपल्या प्रामाणिकपणा, शिस्तबद्ध कार्यपद्धती आणि लोकाभिमुख दृष्टिकोनामुळे त्यांनी राजकीय व सामाजिक क्षेत्रातही वेगळी ओळख निर्माण केली होती. क्रीडा आणि सांस्कृतिक क्षेत्राविषयी त्यांना विशेष जिव्हाळा होता. ते उत्कृष्ट क्रिकेटपटू होते तसेच खो-खो या खेळाच्या विकासासाठीही त्यांनी योगदान दिले. नाट्यकलेवर त्यांचे विशेष प्रेम होते. रंगमंचावरील कलाकारांइतकीच पडद्यामागील कामांनाही त्यांनी महत्त्व दिले. अनेक नाट्यप्रयोग यशस्वी होण्यासाठी त्यांनी अथक परिश्रम घेतले.