खा. सुनील तटकरेंना साकडे

समृद्धीताई कोळी यांनी खा. सुनील तटकरे यांना दिलेल्या निवेदनात म्हटले आहे की, नागोठणे व परिसरातील नागरिकांच्या वतीने आपणास नम्र निवेदन सादर करण्यात येत आहे. नागोठणे विभागात गेल्या काही वर्षांपासून वारंवार वीजपुरवठा खंडित होणे, कमी दाबाने (Low Voltage) वीज मिळणे तसेच तांत्रिक बिघाड झाल्यानंतर वीजपुरवठा पूर्ववत होण्यास मोठा विलंब होणे या समस्या सातत्याने निर्माण होत आहेत. यामुळे सर्वसामान्य नागरिक, शेतकरी, व्यापारी, विद्यार्थी, लघुउद्योग, शासकीय कार्यालये तसेच पाणीपुरवठा योजनांवर गंभीर परिणाम होत असून सर्वांना मोठ्या त्रासाला सामोरे जावे लागत आहे.

नागोठणे परिसरात औद्योगिकीकरण झपाट्याने वाढत असून नवीन उद्योग, व्यावसायिक आस्थापना आणि वाढती लोकसंख्या यामुळे विजेची मागणी दिवसेंदिवस वाढत आहे. भविष्यातही या मागणीत मोठी वाढ होणार असल्याने विद्यमान वीज वितरण यंत्रणेवर अतिरिक्त ताण निर्माण होत आहे. त्यामुळे रिलायन्स इंडस्ट्रीज लिमिटेड, नागोठणे येथे नवीन विद्युत सबस्टेशन उभारण्यात येत असल्याची माहिती उपलब्ध झाली आहे.

त्यामुळे या नवीन सबस्टेशनमधून नागोठणे विभागासाठी स्वतंत्र वीज फीडर उपलब्ध करून दिल्यास संपूर्ण परिसरातील वीजपुरवठा अधिक सक्षम, अखंडित व विश्वासार्ह होण्यास मोठी मदत होईल. तसेच वारंवार होणारे वीज खंडित होण्याचे प्रकार कमी होतील, तांत्रिक बिघाडाच्या वेळी पर्यायी वीजपुरवठा उपलब्ध होईल आणि नागरिक तसेच उद्योगांना मोठा दिलासा मिळेल. तरी आपण या अत्यंत महत्त्वाच्या विषयामध्ये आपण विशेष लक्ष घालून रिलायन्स इंडस्ट्रीज लिमिटेड (IPCL), महावितरणचे वरिष्ठ अधिकारी तसेच संबंधित शासकीय विभाग यांच्यासमवेत संयुक्त बैठक आयोजित करून नागोठणे विभागासाठी नवीन सबस्टेशनमधून स्वतंत्र वीज फीडर उपलब्ध करून देण्याबाबत आवश्यक तो पाठपुरावा करावा अशी विनंतीही खा. सुनील तटकरे यांना दिलेल्या निवेदनात करण्यात आली आहे.