खैर लाकडाचे चोरटे नागोठणे वनखात्याकडून जेरबंद 

यासंदर्भात उपलब्ध झालेल्या माहितीनुसार नागोठणे वन परिक्षेत्र अधिकारी दादासाहेब कुकडे यांना यासंदर्भात गुप्त माहिती मिळाली होती. त्यानुसार उपवनसंरक्षक उमेश वावरे व सहायक वनसंरक्षक भाऊसाहेब जावरे यांच्या मार्गदर्शनाखाली नागोठणे वन परिक्षेत्र अधिकारी दादासाहेब कुकडे यांच्या सूचनेनुसार वन विभागाच्या नागोठणे पथकाने बुधवार (२२ जुलै) रोजी पहाटे पाली-वाकण रस्त्यावरील वजरोली येथे सापळा रचला. रस्त्यालगत हे पथक दबा धरून बसले असतानाच पहाटे सुमारे ३ वाजण्याच्या सुमारास वाकण कडून पालीच्या दिशेने येणारी मारुती अल्टो (एमएच-०६ एएन-२०८३) कार थांबवून तपासणी केली असता, त्यामध्ये ०.३४५ घनमीटर क्षमतेचे १९ नग खैर लाकडाचे तुकडे आढळून आल्याने हा सापळा यशस्वी झाला. या गुन्ह्यात वापरलेली कार, खैर तुकडे व पेट्रोल कटर मशीन जप्त करण्यात आले आहे.